Datganiad i'r Wasg - Yr Adran Cymunedau a Llywodraeth Leol ac Arolygiaeth

Gynllunio Llywodraeth Cynulliad Cymru

Penodi Cyfarwyddwyr Anweithredol

Heddiw cyhoeddodd y Gweinidog dros Gynllunio, y Farwnes Andrews, a Jane Davidson AC - y Gweinidog dros yr Amgylchedd, Cynaliadwyedd a Thai - benodiad dau Gyfarwyddwr Anweithredol newydd ac ailbenodiad un o'r Cyfarwyddwyr Anweithredol cyfredol i'r Arolygiaeth Gynllunio.

Wrth groesawu'r penodiadau dywedodd y Gweinidogion:

"Rydym am i'r Cyfarwyddwyr Anweithredol gyflwyno safbwynt gwrthrychol newydd i'r Arolygiaeth Gynllunio, cyfrannu syniadau newydd a gwella cywirdeb prosesau'r Bwrdd. Rydym yn hyderus y bydd y rhai a benodwyd yn helpu i sicrhau bod yr Arolygiaeth yn gallu ateb yr heriau newydd sy'n codi yn sgîl y Papur Gwyn Cynllunio, er mwyn cyflymu'r system gynllunio ymhellach."

NODYN I OLYGYDDION:

Swyddogaeth Cyfarwyddwyr Anweithredol yr Arolygiaeth Gynllunio yw mynychu cyfarfodydd y Bwrdd Rheoli Strategol a'r Pwyllgor Archwilio a chyfrannu at benderfyniadau cyfunol y Bwrdd ar faterion megis cynllunio busnes, polisi, strategaeth, perfformiad, adnoddau a Llywodraethu Corfforaethol. Byddant yn cynorthwyo drwy gynnig gwybodaeth a chyngor annibynnol yn ôl eu meysydd arbenigedd unigol sy'n seiliedig ar eu profiad ehangach mewn sefydliadau eraill.

Cydymffurfiodd y gweithdrefnau ar gyfer eu penodi ag egwyddorion Swyddfa'r Cabinet ar gyfer penodiadau cyhoeddus. Hysbysebwyd y swyddi ar wefan Penodiadau Cyhoeddus Swyddfa'r Cabinet, ar wefan Cynulliad Cenedlaethol Cymru ac ar wefan yr Arolygiaeth.

Isod ceir cefndir cryno o bob un o'r rhai a benodwyd.

• Roedd Ms Jane Earl yn Brif Weithredwr cyngor lleol rhwng 1999 a 2003. Hi oedd Cyfarwyddwr cyntaf yr Asiantaeth Adennill Asedau (2003-7) ac ar hyn o bryd hi yw Prif Weithredwr (dros dro) Canolfan Celfyddydau 'Rich Mix'. Gweithiodd ar lefel Bwrdd Strategol am yr 8 mlynedd diwethaf ac ar hyn o bryd mae'n cyfrannu at Fwrdd Asiantaeth y Swyddfa Brisio a Bwrdd Canolfan Celfyddydau 'Rich Mix.  

• Mae Ms Liz Peace yn un o Gyfarwyddwyr Anweithredol yr Arolygiaeth Gynllunio ers mis Ionawr 2004. Mae ei phrofiad blaenorol yn cynnwys 27 o flynyddoedd mewn ystod o uwch swyddi gyda'r Weinyddiaeth Amddiffyn. Hi yw Prif Weithredwr Ffederasiwn Eiddo Prydain. Mae gan Ms Peace brofiad yn y sectorau cyhoeddus, preifat a gwirfoddol a rhagor o brofiad wrth ymdrin ag awdurdodau lleol a'r Adran Cymunedau a Llywodraeth Leol.

• Mae gan Mr Deep Sagar brofiad helaeth mewn uwch swyddi yn y sector cyhoeddus a'r sector preifat, gan gynnwys gyda Coca Cola ac Unilever Bestfoods, ac fel Cadeirydd GIG 24. Mae ei benodiadau presennol yn cynnwys Cadeirydd LEASE, aelod o Fwrdd Thurrock Thames Gateway Development Corporation, aelod o'r Tribiwnlysoedd Cyflogaeth a'r Panel Cynghori ar Gasinos.

Penodir Jane Earl a Deep Sagar am gyfnod o ddwy flynedd, gyda'r dewis o estyn eu penodiadau am ddwy flynedd arall. Penodir Liz Peace am flwyddyn. Nod y dyddiadau terfyn gwahanol yw sicrhau parhad y Cyfarwyddwyr Anweithredol yn y dyfodol. Cynigir swydd Cadeirydd Pwyllgor Archwilio'r Arolygiaeth Gynllunio i Mr Sagar hefyd.

Y Bwrdd Rheoli