Costau - Cylchlythyr 23/93 (Y Swyddfa Gymreig)

Dyfarnu costau yr aed iddynt mewn achosion cynllunio ac achosion eraill (gan gynnwys achosion yn ymwneud â Gorchmynion prynu gorfodol)

Cyflwyniad

1. Mae’r Cylchlythyr hwn yn diweddaru ac yn cadarnhau arweiniad polisi ar ddyfarnu costau mewn rhai achosion cynllunio ac achosion eraill. Mae’n dilyn ymarfer ymgynghori â’r cyhoedd ac arolwg gofalus o’r arweiniad cyfredol yng Nghylchlythyr 2/87 DOE (Cylchlythyr 5/87 y Swyddfa Gymreig), yng ngoleuni profiad ymarferol a gafwyd ohono ers mis Ebrill 1987. Ar wahân i baragraff 23, bu’r arweiniad hwnnw yn berthnasol lle y gall yr Ysgrifennydd Gwladol orchymyn un parti i ddwyn achos i gwrdd â chostau parti arall.

2. Cyhoeddwyd arweiniad interim, yng Nghylchlythyr 23/91 DOE (77/91 y Swyddfa Gymreig), ar "Ddyfarnu Costau mewn Achosion Cynllunio, Ar ôl i Ymchwiliad neu Wrandawiad Gael eu Canslo’n Hwyr", ar 16 Rhagfyr, 1991. Esboniai’r arweiniad hwn (yn Ychwanegiad 1) sut y bwriedid i arfer pðer disgresiwn newydd, yn adran 322A o Ddeddf Cynllunio Gwlad a Thref 1990 (a fewnosodwyd gan adran 30 o’r Ddeddf Cynllunio a Digolledu 1991), a ddaeth i rym ar 2 Ionawr, 1992, i ddyfarnu costau ar ôl i ymchwiliad neu wrandawiad gael eu canslo’n hwyr gan y naill barti neu’r llall. Ar ben hynny esboniai’r Cylchlythyr y modd y câi dyfarniadau costau eu cyflwyno mewn achosion trwy wrandawiadau o 2 Ionawr, 1992.

3. Mae ychwanegiadau 1 i 7 at y Cylchlythyr hwn bellach yn darparu arweiniad diwygiedig, gan gynnwys datblygiadau deddfwriaethol yn deillio o Ddeddf Cynllunio a Digolledu 1991, fel a ganlyn:

• Ychwanegiad 1: egwyddorion cyffredinol ar gyfer dyfarnu costau am ymddygiad afresymol
• Ychwanegiad 2: gofynion gweithdrefnol cyffredinol apeliadau: ymddygiad afresymol
• Ychwanegiad 3: ymddygiad afresymol yn ymwneud â sylwedd yr achos, Gan gynnwys camau a gymerwyd cyn cyflwyno’r apêl
• Ychwanegiad 4: cymhwyso’r polisi ar gostau at drydydd partïon mewn achosion
• Ychwanegiad 5: y cais am gostau
• Ychwanegiad 6: costau mewn perthynas â gorchmynion prynu gorfodol a gorchmynion cyfatebol (gan gynnwys rhestr o enghreifftiau o orchmynion cyfatebol)
• Ychwanegiad 7: rhestr o achosion lle y gellir dyfarnu costau pan gynhelir ymchwiliad neu wrandawiad.

Mae crynodeb byr o’r meini prawf ar gyfer dyfarnu costau ar sail ymddygiad afresymol yn yr Atodiad i’r Cylchlythyr hwn.

Pamffledyn esboniadol

4. Pamffledyn esboniadol diwygiedig ("Dyfarnu Costau mewn Apeliadau Cynllunio – Canllaw i’r Apelyddion"), ar gael o’r cyfeiriadau canlynol: -

*Yng Nghymru: Yr Arolygiaeth Gynllunio, Parc Cathays, Caerdydd CF10 3NQ; Ffôn 029 2082 3866

*Yn Lloegr: Planning Inspectorate, Costs Branch, 4/08 Kite Wing , Temple Quay House, 2 The Square, Temple Quay House, Bristol, BS1 6PN.
Ffôn: 0117 372 8594.

Cwmpas y trefniadau diwygiedig

5. Bydd yr arweiniad newydd yn Ychwanegiadau 1 i 6 yn berthnasol i bob apêl a wnaed, neu i achosion eraill a ddechreuwyd, ar ddyddiad y Cylchlythyr hwn neu ar ôl hynny, fel a ganlyn: -

• yr holl gategorïau o achosion trwy ymchwiliad neu wrandawiad yn Ychwanegiad 7, ar wahân i’r rhai a nodir ym mharagraff 8 isod; a’r
• achosion trwy ymchwiliad a nodir ym mharagraff 9 isod.